Durante os últimos meses tiven a oportunidade de colaborar, axudando na parte técnica, en "Ao outro lado do espelllo". O podcast creado por Aseia (Asociación para a saúde emocional na infancia e na adolescencia) nace para pensar a través de películas e series cuestións que afectan á infancia e a adolescencia. Eva e Cris son as voces que conducen este falangullo.
A estrea faise en formato de triloxía sobre o tema do dó. En tres episodios debullan como afecta a perda na infancia e na adolescencia, para tal tarefa parten de tres películas que encadran o capítulo nun tema. Recomendamos ver as películas, se non levades ben os spoilers, antes de escoitar os episodios nos que Eva e Cris parten destas creacións para reflexionar sobre diferentes aspectos da perda na infancia e adolescencia:
1x01 Ao outro lado do espello: Verano 1993. A película de Carla Simón abre a triloxía afrontando a cuestión da perda na infancia.
1x02 Ao outro lado do espello: Fue la mano de Dios. O filme dirixido polo director italiano Paolo Sorrentino serve para adentrarnos en como afecta o dó na adolescencia.
1x03 Ao outro lado do espello: Short Term 12. Nesta película, do director Destin Cretton, adentrámonos na vida de rapazada nun centro de menores e das vivencias das diferentes perdas.
Recomendamos a escoita desta triloxía, que podedes atopar nas plataformas máis coñecidas: Spotify, Ivoox, Archive...