Iniciamos segunda tempada deste falangullo de entrevistas con Laura González Vila.
Unha galega, de Coia, que vive en Toledo. Conversamos con ela sobre educación, ciencia, grupo de consumo, o galego e moitos máis asuntos.
Laura traballa como profesora de secundaria en Fuenlabrada, antes percorreu moitos centros públicos de castela e da comunidade madrileña. Consciente dos límites que lle impón o sistema educativo procura estratexias para superar dita rixidez. No seu caso o teatro, e sobre todo a súa experiencia como monitora en campamentos sonlle de utilidade para levar a ciencia ás aulas dun modo atractivo para o alumnado.
Fixo teatro, estivo de voluntaria en Bolivia, colaborou nunha radio comunitaria (Onda Polígono) e estivo no nacemento dun grupo de consumo. Nel varias familias organízanse na procura de alimentos respectuosos co planeta e coas labregas que os produce. Para Laura o grupo de consumo é un bo xeito para repartir a riqueza e tamén para facer tribo/comunidade. Pechamos o falangullo coa súa recomendación musical: "La danza del fuego" de Mago de Oz.
Agradecemos as escoitas da primeira tempada, tamén a compra de cuncas, e seguimos pedindo que espalledes esta entrevista que podedes escoitar en: IVOOX , SPOTIFY, ARCHIVE e PODGALEGO.