Achegamos a ficha do lavadoiro de San Gregorio, a información do resto de lavadoiros a podedes atopar no documento > Os lavadoiros de Coia
_localización
Accedemos a este lavadoiro dende a rúa Tomás Alonso. Se camiñamos en dirección Bouzas, na coñecida como Curva de San Gregorio -antes de chegar ao nº 138- desviámonos á dereita pola rúa San Gregorio que nos conduce á traseira da gasolineira de Beiramar. A man esquerda desta pequena rúa atopamos o lavadoiro. As súas coordenadas son 42.22529, -8.74495.
A contorna está ocupada por vivendas e naves industriais. É evidente que rúa sufriu un recrecemento que fixo que a superficie de uso do lavadoiro se atope uns 2 metros por baixo da actual rasante da rúa San Gregorio. Neste proceso urbanizador, o extremo sur do ben etnográfico desapareceu baixo os recheos da rúa. Está asociado a unha fonte en desuso.
_descrición
Está construído con perpiaño, e conserva unha pía cuadrangular asociada a unha fila de lousas perimetrais para lavar. Unha pía rectangular transversal á anterior abastece de auga o lavadoiro a partir da fonte. É moi probable que o lavadoiro continuara cara ao sur.
Ten unha cuberta plana de formigón sostida por seis piares.
_documentación histórica
No documento “Mociones para solicitar fuentes y lavaderos en Bouzas y en Coya (14 de agosto 1924-septiembre 1924)”, consultado no arquivo municipal de Vigo, alúdese a que:
“...que el único lavadero que hay... (en Bouzas),... desde que dejó de llover, repugna ver el agua en que están lavando las pobres mujeres las ropas blancas y de color que, como se saben es de obreros de todas las clases de mar y tierra, y si tarda mucho en llover secará del todo...”.
No documento “Certificados de construcción de lavaderos y subvenciones concedidas para ellos como obras sociales del Movimiento (1952-53)”, aparecen varias certificacións de obras; entre elas:
“...En el lugar de San Gregorio de la parroquia de Bouzas, ...consistentes en la reparación del estanque de cantería, con nueva cubierta de Uralita. El importe de las obras fue de seis mil cincuenta pesetas. Las reciben el 30 de agosto de 1952 el arquitecto municpal y el teniente de alcalde. Hechas en base a subvención de la Diputación de Pontevedra...”.
Na comunicación que a Junta de Ayuda a Municipios e Instituciones envía ao Concello (con data de 17 de xaneiro de 1952) comunicando as subvencións, especifica que “...estas obras llevarán, en lugar claro y visible, el YUGO y las FLECHAS, emblema del Movimiento y las iniciales J.A.M. (Junta de Ayuda a Municipios), con la fecha del año de ejecución...”.